Лукашенко: Шефот на групата „Вагнер“ не е во Белорусија туку во Русија

АНКАРА (АА) - Шефот на „Вагнер“, Евгениј Пригожин, моментално не е во Белорусија, каде што пристигна по краткотрајниот бунт на платеничката група минатиот месец, туку во Санкт Петербург, Русија, изјави белорускиот претседател Александар Лукашенко, јавува Анадолу.

„Што се однесува до Евгениј Пригожин, тој е во (руски) Санкт Петербург. Каде е утрово? Можеби отишол во Москва, можеби на друго место, но не е на територијата на Белорусија“, изјави Лукашенко за новинарите за време на прес-конференција во главниот град Минск.

Лукашенко истакна дека не гледа ризици за Белорусија доколку борците на паравоената група бидат префрлени во неговата земја, додавајќи дека тие можат да се искористат за одбрана на Белорусија.

„Колку што сум информиран, борците, многу сериозни борци на ПВК Вагнер - се во нивните постојани кампови. Тие се во камповите каде што се сместија по повлекувањето од фронтот за лекување, одмор итн. Има нормална ротација за таква војна. По (борбите во украински) Бахмут, тие беа однесени во нивниот камп, каде што се и денес.“

Белорускиот претседател истакна и дека прашањето за релокацијата и прераспоредување на групата „Вагнер“ во Белорусија сѐ уште не е решено, и дека тоа зависи од раководството на паравоената група и од руските власти.

На 24 јуни, Пригожин го обвини руското Министерство за одбрана дека ги напаѓа неговите борци и објави „Марш на правдата“ и тргна кон Москва.

Руската Федерална служба за безбедност ги окарактеризира дејствијата на групата „Вагнер“ како вооружен бунт и отвори кривична постапка против Пригожин, додека претседателот Владимир Путин го нарече бунтот на приватната воена компанија како чин на предавство.

Но, Пригожин потоа се врати назад „за да избегне крвопролевање“ по што се префрли во Белорусија според договорот постигнат со посредство на Лукашенко.