Лекари без граници: Здравствената состојба во Газа се влошува од ден на ден

ЖЕНЕВА (АА) - МУХАМЕТ ИКБАЛ АРСЛАН -

Заменик-медицинскиот координатор на Лекари без граници (МСФ) во Газа, Мухамед Абу Мугајсиб, изјави дека здравствената состојба во Газа од ден на ден се влошува, јавува Анадолу.

Мугајсиб одговараше на прашањата на новинарите на АА за последната ситуација во Газа, која е под интензивни израелски напади и блокада, како и за тешкотиите во обезбедувањето здравствени услуги.

Истакнувајќи дека во Газа се убиени повеќе од 30.000 луѓе, главно жени и деца, Мугајсиб рече: „Ова е доволно за да се опише моментната ситуација во Газа.“

Мугајсиб истакна дека како Лекари без граници тие поддржувале неколку болници во градот Рафа во Јужна Газа, но не можеле да стигнат до другите болници на север, во Хан Јунис и градот Газа.

„Не постои безбедна зона во Газа. Ова се однесува и на луѓето и на здравствените работници“, рече Мугајсиб.

Тој изјави дека раселените, особено на југот на Газа, ќе се соочат со големи потешкотии за време на Рамазан, светиот месец на муслиманите.

Тој потсети дека околу 1,5 милиони луѓе живеат во шатори во Рафа.

Истакнувајќи дека хуманитарната помош испорачана во Газа не е доволна, Мугајсиб повика на зголемување на хуманитарната помош, вклучително и медицинската помош за Газа.

Тој изјави дека прават сѐ за да им овозможат здравствена заштита на пациентите, но дека ситуацијата е потешка отколку што изгледа.

„Здравствената состојба во Газа од ден на ден се влошува. Во моментов има многу малку болници што работат на југот на Газа“, додаде Мугајсиб.