Кутии со хуманитарна помош фрлени од авион над Газа паднаа врз луѓе: „Има мртви и повредени“

ГАЗА (АА) - Неколку луѓе ги загубија животите, а има и повредени откако падобраните со кутии хуманитарна помош не се отворија и паднаа врз Палестинците додека чекале помош во Појасот Газа, јавува Анадолу.

Според зборовите на очевидците, некои од падобраните со пакетите хуманитарна помош воопшто не се отвориле и паднале врз Палестинците кои ја чекале помошта.

Кутиите паднале врз цивилите што чекале хуманитарна помош во бегалскиот камп Шати и на улицата Џела во северниот дел на градот Газа.

Од болнички извори се дознава дека има мртви и повредени по паѓањето на пакетите хуманитарна помош врз луѓето.

Локалните извори наведуваат дека повредените се префрлени во болниците Ал Шифа и Ал Ахли во Газа.

Египет, Обединетите Арапски Емирати (ОАЕ), Јордан, Катар, Оман и Бахреин минатата недела организираа заеднички акции за испуштање помош во Појасот Газа.

Палестинците што се обидоа да дојдат до помошта и претходно имаа проблеми бидејќи хуманитарната помош фрлена над Газа паѓаше во море.

Некои луѓе влегуваа во морето во рибарски чамци, а некои пливаа за да дојдат до многу неопходната хуманитарна помош.