Кремљ: „Постои можност за средба меѓу Путин и Ердоган во Астана оваа недела“

МОСКВА (АА) - Портпаролот на Кремљ, Дмитриј Песков, денес изјави дека постои можност рускиот и турскиот претседател да се сретнат во главниот град на Казахстан, Астана, кон крајот на оваа недела, јавува Агенција Анадолија (АА).

„Владимир Путин и Реџеп Таип Ердоган ќе отпатуваат оваа недела во Казахстан и лидерите можно е да одржат состанок на маргините на главните настани“, изјави Песков за новинарите на брифингот во Москва.

Песков негативно одговори на прашањето дали Анкара ѝ дала на Русија предлози за одржување разговори меѓу Русија и Западот, но тој рече дека тоа прашање може да биде започнато на средбата меѓу Ердоган и Путин.

Портпаролот на Кремљ ги најави и другите состаноци на Путин за вторник - со претседателот на Обединетите Арапски Емирати, Мухамед ал-Нахјан, и со генералниот директор на МААЕ, Рафаел Гроси, во Санкт Петербург.

Тој, исто така, рече дека Путин ќе одржи неколку одделни состаноци во Астана на маргините на самитот Русија - Централна Азија.