Elena Teslova
17 Ноември 2023•Ажурирај: 18 Ноември 2023
МОСКВА (АА) - Портпаролот на Кремљ, Дмитриј Песков, денес ги отфрли тврдењата дека Москва би можела да започне нуклеарна војна, нарекувајќи ги „апсолутно луди“, пренесува Анадолу.
Русија е „исклучително одговорна и претпазлива“ во однос на нуклеарното оружје, рече Песков во интервју за ТВ-каналот МГИМО 360.
„За жал, во последната година сè почесто слушаме таква неодговорна нуклеарна реторика, слушаме апсолутно луди обвинувања против Русија дека сме подготвени, велат тие, да започнеме нуклеарна војна. Русија, како голема, моќна, силна земја, е исклучително одговорна и внимателна во пристапот кон она што го поседува“, нагласи Песков.
Портпаролот на рускиот претседател додаде дека се користи „нуклеарна реторика“ за да се прикаже Русија како закана во хибридната војна.
„Задачата на сите нас е едноставно да објасниме дека тоа се неаргументирани изјави и едноставно неодговорни зборови“, рече Песков.
Русија распореди нуклеарно оружје во соседна Белорусија претходно оваа година, а западните претставници, вклучително и американскиот претседател Џо Бајден, тоа го нарекоа закана. Москва ги отфрли критиките, велејќи дека САД со децении распоредувале такво нуклеарно оружје во Европа.
Руската „специјална воена операција“ во Украина во февруари 2022 година доведе до невидени тензии со Западот.
Песков рече дека по распадот на Советскиот Сојуз, врз основа на неговата економска моќ и технолошки развој, Западот се смета себеси за „господар на светот, способен да ги пишува правилата и да им ги наметне на другите народи“.
„Меѓутоа, со текот на времето, некои земји достигнаа ниво на развој доволно за да се борат за суверенитет и независност, а неподготвеноста да продолжат да му се покоруваат на Западот доведе до конфликт“, смета Песков.
Тој додаде дека „сериозниот недостаток на предвидливост“ во политиката или економијата го оневозможува предвидувањето на иднината на светот десет години отсега, но се надева дека Русија ќе биде „помудра, побогата и посилна“.
