Кокаин скриен во пратки со банани пронајден во дански супермаркети

БРИСЕЛ (АА) - Значителна количина кокаин е откриена во пратки со банани во повеќе дански супермаркети, објави јавниот радиодифузен сервис ДР денес, јавува Анадолу.

Во веста се наведува дека вработените во 12 малопродажни продавници на „Куп“ ја пронашле дрогата скриена меѓу гроздови банани претходно оваа недела.

Националната единица за специјални кривични дела (NSK) на Данска започна истрага за да утврди како кокаинот завршил во редовните испораки на супермаркетите. Полицискиот инспектор Хенрик Андерсен изјави дека случајот се сфаќа „исклучително сериозно“, иако повеќе детали не се откриени.

Професорот и криминолог од Универзитетот во Копенхаген, Хенрик Виг, за ДР изјави дека користењето банани за шверц на кокаин е дел од растечкиот тренд. Поради лесно расипливата природа на овошјето, контејнерите со банани честопати брзо минуваат низ царината, што ги прави привлечна маска за шверцерите.

Во извештајот се наведува дека слични инциденти се случиле неодамна во Германија и Норвешка. Минатата година, 95 килограми кокаин беа пронајдени во банани во Германија, а во декември 2023 година, 134 килограми беа запленети во Норвешка.

Како дел од тековната истрага, 37-годишен вработен во „Куп“ беше приведен во четвртокот откако во неговиот автомобил беше пронајден еден килограм кокаин. Властите не потврдија дали случајот е директно поврзан со запленувањата во супермаркетите.