Кинеските власти потврдија дека загинале сите 132 лица од паднатиот авионот на „Чајна истерн ерлајнс“

ПЕКИНГ (АА) - Животот го загубија сите 132 лица што се наоѓаа во авионот на „Чајна истерн ерлајнс“, што се урна на 21 март, известува Агенција Анадолија (АА).

Во соопштението на Командниот центар за потрага и спасување, формирано во градот Вуџоу, се наведува дека во авионската несреќа животот го загубиле 123 патници и 9 членови на екипажот.

Џу Тао, раководител на Канцеларијата за безбедност на воздушниот сообраќај на кинеската Управа за цивилно воздухопловство, изјави дека продолжуваат да трагаат по втората црна кутија која ги регистрира податоците за летот.

Едната црна кутија е пронајдена на 23 март и испратена е во Пекинг на анализа, по што е соопштено дека станува збор за уред кој ги регистрира звуците во кокпитот.

Претрагата на теренот од подрачјето на несреќата се води во отежнати временски услови.

Авионот „Боинг 737-800“ со 123 патници и 9 членови на екипажот, на 21 март летал на релацијата од Кунминг кон Гуангџоу во Кина, кога се урна во планинското подрачје во близина на градот Вуџоу.