ОН: Од почетокот на војната во Украина загинаа најмалку 1.104 цивили, 3,77 милиони луѓе ја напуштија земјата

ЖЕНЕВА (АА) - Обединетите нации објавија дека од почетокот на руско-украинската војна животот го загубиле најмалку 1.104 цивили, а ранети се 1.754, и додаваат дека 3.772.599 лица избегале во соседните земји, известува Агенција Анадолија (АА).

Во соопштението на Високиот комесаријат за бегалци на ОН (UNHCR) се наведува дека податоците во врска со бегалската криза во Украина се добиени од различни извори.

Според објавените податоци, од 24 февруари до 25 март од Украина во соседните земји преминале 3.772.599 бегалци, од кои повеќето од половината заминале за Полска (2,23 милиони). Во Романија избегале 579.800, додека во Молдавија 379.204 украински бегалци.

Паралелно со ова, Меѓународната организација за миграции (IOM) објави дека во границите на Украина се раселени приближно 6,5 милиони луѓе. Тоа значи дека вкупната бројка на раселени лица во Украина и надвор од неа надминува 10 милиони.

Според податоците на Високиот комесаријат за човекови права на ОН, најмалку 1.104 цивили се убиени, а 1.754 се ранети во судирите во руско-украинската војна од 24 февруари до 25 март.

Во соопштението на УНХЦР се предупредува дека бројката на загинати и повредени цивили би можела да многу поголема од утврдената.

ОН објавуваат само бројки на цивилни жртви во Украина што се потврдени. Украинските власти тврдат дека билансот на загинати цивили е изразен во илјади.