Riyaz Khaliq Khaliq
24 Октомври 2024•Ажурирај: 25 Октомври 2024
ИСТАНБУЛ (АА) - Истакнувајќи дека не треба да има повеќе страдање и уништување во Палестина и Либан, кинескиот претседател Си Ѓинпинг денес ги повика земјите членки на БРИКС „да го поддржуваат мирот и да се стремат кон заедничка безбедност“, јавува Анадолу.
„Треба да излеземе заедно за да формираме стабилизирачка сила за мир и да истражиме решенија за решавање на симптомите и коренот на проблемот“, изјави Си пред присутните на самитот на блокот БРИКС што се одржа во југозападниот руски град Казан.
Претседателот Владимир Путин беше меѓу лидерите на самитот на БРИКС каде што кинескиот лидер го повтори својот повик за ставање крај на војната меѓу Москва и Киев.
Русија започна „специјална операција“ против Украина во февруари 2022 година. Стотици илјади луѓе се убиени, додека милиони се раселени.
Еден ден претходно, Си повика на деескалација меѓу Русија и Украина бидејќи војната трае речиси три години.
„Треба да продолжиме да вршиме притисок за прекин на огнот во Газа, повторно да го започнеме дводржавното решение и да го запреме ширењето на војната во Либан. Не треба да има повеќе страдање и уништување во Палестина и Либан“, нагласи Си.
Укажувајќи на прашањата за проширување на економскиот блок во подем, Си ја изрази поддршката на Кина за „поголемо вклучување на државите од глобалниот југ во прашањата на БРИКС“.
„Колективниот подем на 'глобалниот југ' е јасен знак за големите промени во светот“, истакна Си.
„Голем настан во светската историја и невиден подвиг во процесот на човековата цивилизација е што земјите од глобалниот југ заеднички се движат кон модернизација“, додаде кинескиот лидер.
Тој се обрати на последниот ден од самитот на БРИКС, со состанокот во формат „БРИКС Outreach/Plus“ како главен белег.
Овој собир вклучува нации кои не се членки на БРИКС, но се заинтересирани за зајакнување на нивните врски со економскиот блок.
Организацискиот комитет на БРИКС објави дека на состанокот ќе присуствуваат 36 земји, а 22 ќе бидат претставени од шефови на држави, меѓу кои и турскиот претседател Реџеп Таип Ердоган.
На самитот присуствуваат лидери од Азија, Африка, Блискиот Исток и Латинска Америка, како и претставници на повеќе меѓународни организации. Руската делегација ја предводи претседателот Путин.
Лиидерите на БРИКС вчера ја усвоија Декларацијата на Самитот во Казан, која го сумираше исходот од самитот и мандатот на Русија како претседавач со БРИКС.
