Ömer Faruk Yıldız
09 Февруари 2020•Ажурирај: 10 Февруари 2020
КУАЛА ЛУМПУР (АА) - Италијанскиот парламентарец Микеле Пирас изјави дека Италија и Турција може да подготват мировен план за Палестина кој би бил алтернатива на таканаречениот мировен план за Блискиот Исток, што го објави американскиот претседател Доналд Трамп, јавува Агенција Анадолија (АА).
Како член на италијанската делегација, Пирас имаше обраќање на 3. Меѓупарламентарна конференција за Ерусалим, којашто се одржува во малезискиот главен град Куала Лумпур.
Предупредувајќи дека на подрачјето на Медитеранот и на Блискиот Исток се надѕираат нови бранови на војна, Пирас рече дека нови неправди и кризи во светот избиваат додека западните и источните сили работат на јакнењето на сопственото влијание на Блискиот Исток.
Тој рече дека апсолутно го отфрла американскиот таканаречен мировен план за Блискиот Исток, кој предвидува Ерусалим да биде неделив главен град на Израел.
„Ерусалим секако е главен град на Палестина, но тој воедно е и светска престолнина на духовноста, мирот и дијалогот“, порача Пирас.
Тој потоа за АА изјави дека на конференцијата во Малезија дошол со цел гласно да каже дека е против американскиот план што Трамп го нарекува „Договор на векот“.
„Неопходно е да се гради праведен мир и за Палестина. Тоа значи дека Израел треба да се врати во рамките на некои претходни граници, дека мора да се овозможи враќање на изгонетите Палестинци и меѓународната заедница да признае независна палестинска држава“, рече Пирас.
Истакнувајќи дека палестинското прашање не претставува локално прашање, Пирас рече дека мирот во Медитеранот и на Блискиот Исток значи и мир во Европа, и дека затоа Палестина треба да биде главна тема и за Италија и за Европа.
На прашањето дали Турција и Италија би можеле заедно да направат нешто во процесот за решавање на кризата на Блискиот Исток, Пирас одговори дека двете земји треба да седнат заедно и да работат на изградбата на праведен мир.
„Турција и Италија можат да подготват мировен план за Палестина што би бил алтернатива за таканаречениот мировен план на Трамп“, рече Пирас и додаде дека тој план би требало да биде врз основа на осигурување културна, економска и политичка независност на Палестина.
Пирас порача дека ќе продолжи да дава поддршка на палестинското прашање и дека е горд што со тоа ја претставува својата земја.
