ВАШИНГТОН (АА) - Американските медиуми, повикувајќи се на американски претставници, објавија дека Израел извршил напад на иранска територија, пренесува Анадолу.

Веста за израелскиот напад врз Иран, која прв ја објави американскиот канал Еј-би-си њуз, повикувајќи се на американски претставник, подоцна ја пренесоа Си-би-ес њуз и Си-ен-ен.

Според извори на неименувани американски претставници, Израел извршил „контранапад“ врз Иран во раните утрински часови денес (петок) по локално време.

Американскиот Еј-би-си њуз наведе дека Израел погодил и некои подрачја во Сирија и Ирак, но не е потврдено.

Во разговор за Си-ен-ен, американскиот претставник рече дека администрацијата на Џо Бајден не дала „зелено светло“ за израелскиот „контранапад врз Иран“ и дека САД не сакаат сеопфатен конфликт во регионот.

Стејт департментот и Пентагон сѐ уште не потврдиле дека станува збор за напад.

Иранските медиуми јавија дека експлозии се слушнале во североисточната провинција Исфахан, каде што се наоѓа базата на иранското воено воздухопловство.

Државната телевизија наведе дека во провинцијата Исфахан се слушнала релативно силна експлозија.

„Изворот на експлозијата сѐ уште не е откриен“, објави иранската државна телевизија.

Новинската агенција Фарс, повикувајќи се на локални извори, јави дека во градот Кехџаваристан, североисточно од Исфахан, се слушнала експлозија.