Haydar Şahin
12 Септември 2022•Ажурирај: 13 Септември 2022
ТЕХЕРАН (АА) - Портпаролот на Министерството за надворешни работи на Иран, Насир Кенани, истакна дека Европејците треба да следат конструктивен пат во нуклеарните преговори, да ги поправат грешките од минатото и да го отворат патот на договорот, јавува Агенција Анадолија (АА).
Кенани на прес-конференција во Техеран говореше за актуелните теми.
Тој тврди дека заедничката декларација на Германија, Велика Британија и Франција во врска со тоа дека ставот на Иран околу Меѓународната агенција за атомска енергија ги нарушува преговорите, е погрешна и е објавена на погрешно време.
Според него, Иран вложува секаков напор за постигнување договор во постоечкиот преговарачки процес. Тој истакна дека од Западњаците бараат да се однесуваат конструктивно.
Кенани рече дека во извештаите на Меѓународната агенција за атомска енергија се потврдува дека нуклеарните активности на Иран се мировни, и дека декларацијата на трите европски земји во врска со преговорите во Виена е погрешна.
„Европејците треба да ги поправат грешките од минатото и да го отворат патот на договорот“, истакна Кенани, додавајќи дека Европејците треба да следат конструктивен пат.
Тој нагласи дека Иран е подготвен да го продолжи конструктивниот договор со Меѓународната агенција за атомска енергија.
Од друга страна, Кенани ги негираше обвинувањата против неговата земја во врска со кибернападот врз Албанија.
