Ahmet Dursun
03 Ноември 2021•Ажурирај: 04 Ноември 2021
АНКАРА
Иран соопшти дека разговорите за заживување на Нуклеарниот договор и враќањето на САД на договорот ќе пропаднат доколку Вашингтон не гарантира дека повторно нема да се откаже од договорот, пренесува Агенција Анадолија (АА).
Али Шемхани, генералниот секретар на Врховниот совет за национална безбедност на Иран, во изјавата споделена на својот профил на Твитер напиша: „Неовластениот американски претседател [Џо Бајден] не е подготвен да даде гаранции. Доколку сегашната ситуација не се промени, резултатите од преговорите се јасни.“
Во 2015 година беше потпишан договор меѓу Иран и постојаните членки на Советот за безбедност на Обединетите нации (СБОН), САД, Русија, Кина, Велика Британија и Франција и Германија (5+1), со кој се регулираат и контролираат нуклеарните активности на Техеран.
Вашингтон за време на претседателствувањето на Доналд Трамп еднострано се повлече од договорот на 8 мај 2018 година и почна повторно да воведува санкции кон Иран.
Администрацијата на Џо Бајден, кога тој ја презеде функцијата во САД, најави дека ќе се вратат на договорот доколку Техеран ги исполни своите обврски во договорот.
Од друга страна, Иран истакна дека САД прво треба да се вратат на договорот и да ги укинат санкциите, бидејќи таа е страната која прва се повлече од договорот.
Страните на Нуклеарниот договор ги започнаа преговорите во Виена, главниот град на Австрија, на 6 април, а разговорите беа прекинати на крајот на јуни.
Во меѓувреме, во Иран, за разлика од претходната Влада, на власт дојде Влада формирана од конзервативци, која не беше блиска со Западот и се бранеше дека Нуклеарниот договор не е во корист на земјата.
Во време кога страните бараа Техеран да се врати на маса, иранскиот заменик-министер за надворешни работи, Али Бакири, најави дека преговорите во Виена би можеле да започнат на крајот на ноември, а прелиминарните разговори меѓу Европската Унија (ЕУ) и Иран започнаа повторно на 14 октомври.
