Илјадници на протестен марш во Лондон: Повик за прекин на огнот во Газа и стопирање на продажбата на оружје на Израел

ЛОНДОН (АА) - Илјадници луѓе вчера маршираа кон израелската амбасада во Лондон за да повикаат на итен прекин на огнот во Појасот Газа и да се запре испораката на оружје за Израел, известува Анадолу.

Насобраните пред Пикадили во центарот на Лондон пешачеа до израелската амбасада, во марш што се одржа по 19-ти пат од октомври минатата година.

Носејќи палестински знамиња, демонстрантите повикаа на итен прекин на огнот во Појасот Газа и целосен прекин на испораката на оружје за Израел бидејќи повеќе од 40.000 луѓе се убиени во израелските напади врз Газа од 7 октомври.

Британската Влада во понеделникот објави дека суспендирала 30 од 350 дозволи за извоз на оружје за Израел по спроведената ревизија, предупредувајќи дека постои јасен ризик одреден извоз на британско оружје во Израел да биде искористено за извршување или олеснување на сериозни прекршувања на меѓународното хуманитарно право.

Триесетте лиценци покриваат компоненти за воени авиони, хеликоптери, беспилотни летала и предмети кои помагаат за таргетирање на копнени цели, со исклучок на компонентите од Велика Британија за програмата за борбени авиони Ф-35.

Извикувајќи пропалестински слогани, демонстрантите ја повикаа британската влада да стори повеќе за да го запре тековното убивање во Газа.