САНА (АА) - Илјадници Јеменци вчера учествуваа на масовниот собир во Сана, кој е под контрола на бунтовничкото движење Хуси. Собирот се одржа во знак на поддршка на палестинскиот народ во Појасот Газа, кој се соочува со израелски разорни напади од 7 октомври, известува Анадолу.
Пропалестинскиот собир се одржа на плоштадот Ал Сабин во Сана, а портпаролот на воената група Хуси, Јахја Сари, изјави дека јеменскиот народ ја продолжува својата поддршка за палестинскиот народ во Газа.
Протестот е организиран од групата Хуси, која најави и продолжување на нападите во Црвеното Море врз бродовите поврзани со Израел и воените бродови на САД и на Велика Британија.
На собирот во Сана, демонстрантите виореа палестински знамиња и скандираа против израелската војна во Газа.
Тензиите во Црвеното Море ескалираа по нападите на Хусите врз комерцијалните бродови за кои оваа група се сомневала дека се поврзани со Израел.
Хусите велат дека нивните напади имаат за цел вршење притисок врз Израел за да ги запре своите смртоносни напади на Појасот Газа.
САД и Велика Британија започнаа воздушни напади на позициите на Хусите во Јемен на 12 јануари во знак на одмазда за нападите во Црвеното Море.
Црвеното Море е едно од најчесто користените морски патишта во светот за транспорт на нафта и горива. Тензиите во овој регион предизвикаа страв од нов раст на инфлацијата и прекин на ланецот на снабдување.
