Израелските сили ранија деветмина Палестинци во бегалскиот камп Тулкарем на Западниот Брег

РАМАЛА (АА) - Израелските сили ранија деветмина Палестинци во нападот на градот Тулкарем на северниот дел на окупираниот Западен Брег, јавува Анадолу.

Палестинската Црвена полумесечина соопшти дека израелските сили бомбардирале куќа во бегалскиот камп Тулкарем.

Соопштено е дека медицинските тимови интервенирале кај деветмина Палестинци кои биле повредени за време на бомбардирањето.

Според информациите добиени од очевидци, израелската армија упаднала во градот Тулкарем и бегалскиот камп и се распоредила на улиците околу кампот.

Израелските војници го опколија кампот од сите страни и поставија снајперисти на покривите на високите згради.

Локалните извори јавија дека во кампот одвреме-навреме се слушаат експлозии и истрели.

Утринава израелските сили извршија голем број рации на окупираниот Западен Брег, во Рамала, Ал-Бире и Калкилија.

Во нападите на израелските сили и еврејските доселеници на окупираниот Западен Брег и Источен Ал Кудс (Ерусалим) од 7 октомври загинаа 340 Палестинци.