Израелските министри се закануваат со распуштање на Владата доколку Нетанјаху се согласи со предлогот на Бајден за Газа

ЕРУСАЛИМ (АА) - Израелските екстремно десничарски министри денес се заканија дека ќе ја распуштат владата доколку премиерот Бенјамин Нетанјаху се согласи со предлогот на американскиот претседател Џо Бајден за прекин на огнот во Појасот Газа, пренесува Анадолу.

Министерот за национална безбедност Итмар Бен-Гвир на платформата X се закани со распуштање на владата доколку Нетанјаху се согласи со договорот за прекин на огнот објавен од Бајден.

Министерот за финансии Безалел Смотрич се закани дека ќе поднесе оставка доколку војната заврши без да се елиминира Хамас, објави израелскиот Канал 12.

Американскиот претседател Џо Бајден во петокот изјави дека Израел ѝ доставил на палестинската група на отпорот Хамас договор во три фази со кој ќе се прекинат непријателствата во опколениот Појас Газа и ќе се обезбеди ослободување на затворениците кои се држат во палестинската енклава.

Бајден апелираше до Хамас да го прифати договорот и го повика израелскиот премиер Бенјамин Нетанјаху да се спротивстави на притисокот од членовите на неговата владејачка коалиција кои се противат на планот.

Канцеларијата на Нетанјаху во петокот ја повтори својата намера да ја продолжи офанзивата на земјата во Газа додека не се исполнат сите воени цели на Тел Авив.

Хамас рече дека ќе одговори позитивно на секој предлог што вклучува траен прекин на огнот, целосно повлекување од Појасот Газа, напори за обнова, враќање на раселените и склучување на сеопфатен договор за размена на заложници.