Израелскиот Кнесет го одобри законот со кој Нетанјаху ја зацврстува контролата врз судството
Законот беше изгласан со 67 гласа „за“ и еден „против“ во третото и последно читање во 120-члениот Кнесет, се наведува во соопштението на Парламентот.
ЕРУСАЛИМ / АНКАРА (АА) – Израелскиот Кнесет усвои нов закон со кој се менува составот на Комисијата за избор на судии, зајакнувајќи ја контролата на премиерот Бенјамин Нетанјаху и неговата десничарска коалиција врз судскиот систем, јавува Анадолу.
Законот беше изгласан со 67 гласа „за“ и еден „против“ во третото и последно читање во 120-члениот Кнесет, се наведува во соопштението на Парламентот.
Според израелскиот јавен радиодифузен сервис КАН, опозициските пратеници го напуштија заседанието во знак на протест против гласањето.
Новата законска мерка го укинува правото на Адвокатската комора на Израел да назначува два члена во деветчлената Комисија за избор на судии, пренесувајќи ја оваа надлежност на политичките партии. Едното место ќе припадне на владејачката коалиција, а другото на опозицијата.
Оваа комисија игра клучна улога во изборот на судии во сите судови низ Израел, вклучително и Врховниот суд, Централниот суд, судовите за прекршоци и други правосудни институции.
Законот ќе стапи на сила по следните општи избори на крајот од 2026 година, освен ако не се одржат предвремени избори, јавува дописникот на Анадолу.
Критичарите го сметаат овој закон за уште еден обид на Владата на Нетанјаху да ја стави судската власт под политичка контрола, што, според нив, би можело да ја загрози независноста на судовите.
Од друга страна, владејачката коалиција тврди дека промената е неопходна за судска реформа која ќе обезбеди поширока застапеност при именувањето на судии.
Законот е донесен во време на зголемени тензии меѓу Владата на Нетанјаху и Адвокатската комора, во контекст на потезите на премиерот против судството.
Во вторникот, Врховниот суд го отфрли барањето на Нетанјаху за укинување на забраната за разрешување на директорот на израелската безбедносна служба Шин Бет, Ронен Бар, што дополнително ги зголеми тензиите меѓу Владата и судскиот систем.
Во неделата, израелската Влада ја повлече довербата на државната обвинителка Гали Бахарав-Миара, што се смета за уште еден потег на Нетанјаху во правец на поткопување на судската независност.
