Израелскиот Кнесет гласаше против формирањето палестинска држава

АЛ-КУДС/ЕРУСАЛИМ (АА) - Израелскиот парламент (Кнесет) рано утринава гласаше за усвојување на резолуцијата со која се отфрла формирање на палестинска држава, пренесува Анадолу.

Во резолуцијата, која беше усвоена со 68 гласа „за“, девет „против“, се наведува дека палестинската држава би била „егзистенцијална закана“ за Израел.

Предлогот го поднесе опозициската партија Нова надеж-Обединета десница и беше поддржан од неколку партии во коалицијата на премиерот Бенјамин Нетанјаху и Партијата за национално единство предводена од поранешниот министер на Воениот кабинет, Бени Ганц.

Членовите на партијата Јеш Атид на опозицискиот лидер Јаир Лапид ја напуштија салата на Кнесетот за да избегнат поддршка за предлогот, за кој арапските членови на Кнесетот гласаа против.

Во предлогот се тврди дека формирањето палестинска држава „во срцето на Израел“ би претставувало „егзистенцијална закана за државата Израел и нејзините граѓани“.

Палестинците сè уште не го коментираа гласањето во Кнесетот.

Гласањето се случи неколку дена пред посетата на Нетанјаху на Вашингтон, каде што ќе се сретне со американскиот претседател Џо Бајден и ќе се обрати во Конгресот.

Палестинците се стремат кон основање независна држава во Појасот Газа и Западниот Брег со главен град Источен Ал-Кудс/Ерусалим.