Ekipa
20 Ноември 2023•Ажурирај: 21 Ноември 2023
ГАЗА (АА) - Најмалку 12 Палестинци загинаа, а голем број се повредени во денешното израелско гранатирање на Индонезиската болница во северниот дел на Појасот Газа, соопшти Министерството за здравство во блокираната енклава, јавува Анадолу.
Министерството предупреди дека животите на илјадници пациенти, медицински персонал и раселени лица „се изложени на ризик од смрт поради директното и континуирано бомбардирање на Индонезиската болница“.
Државната палестинска новинска агенција Вафа претходно објави дека осум лица загинале во израелското артилериско гранатирање на болницата.
Агенцијата додава дека во болницата има 150 пациенти, 100 лица медицински персонал и илјадници раселени луѓе.
Очевидци изјавија дека поради израелското гранатирање снемало струја во болницата откако нејзините генератори престанале да работат.
Откога Израел почна да ја бомбардира Газа на 7 октомври по нападот на Хамас, според најновите податоци, загинати се најмалку 13.000 Палестинци, од кои над 9.000 жени и деца, а повеќе од 30.000 се повредени.
Илјадници згради, меѓу кои и болници, џамии и цркви, исто така, се оштетени или уништени во немилосрдните воздушни и копнени напади на Израел врз опколената енклава.
Израелската блокада наметна прекин на снабдувањето со гориво за Газа, електрична енергија и вода, а ја ограничи и испораката на хуманитарна помош.
Според официјални податоци, бројот на загинати во Израел изнесува околу 1.200.
