Mahmut Geldi
18 Ноември 2023•Ажурирај: 19 Ноември 2023
ИСТАНБУЛ (АА) - Израелската војска под присила го депортираше мнозинството од пациентите во болницата Ал Шифа во Газа, како и сите раселени Палестинци кои се наоѓале во болницата, известува Анадолу.
Директорот за здравство на Газа, Мунир ал Берш, изјави дека од 650 пациенти во болницата останале околу 100-120 лица и дека им е потребна координација со Обединетите нации (ОН) за нивна евакуација.
Берш рече дека контактирале со Меѓународниот одбор на Црвениот крст за да го спречат преместувањето на бебињата од инкубаторите на болницата. Тој наведе дека можат да остават само 5 лекари да им помагаат на пациентите.
Директорот Берш во директен пренос на телевизискиот канал Ел Џазира телефонски рече дека израелските војници цела ноќ преговарале за болницата Ал Шифа да биде испразнета.
Тој рече дека раселените Палестинци во болницата се замолени да излезат пешки и дека биле принудени да го сторат тоа.
Берш зборувајќи дека подрачјето го напуштиле со пациенти на носилки и во инвалидски колички, додаде дека се плашеле од израелските снајперисти, сместени на крововите од зградите покрај патот, дека би можеле да пукаат кон нив.
Берш рече дека пешачеле од болницата кон југот на Газа и додаде дека пациентите и ранетите врискале и барале помош поради болките што ги чувствувале при транспортот.
Истакнувајќи дека ситуацијата во болницата Ал Шифа, во која упаднале израелските војници е многу лоша, Берш наведе дека војниците постојано шетаат низ болницата, а на крововите од зградите се стационирани снајперисти.
