Израелската војска ги бомбардираше одделението за интензивна нега и породилиштето во болницата Ал-Шифа

ГАЗА (АА) - Владата во Газа синоќа објави дека израелската војска ги бомбардирала одделението за интензивна нега, операционите сали и зградата на породилиштето во комплексот на болницата Ал-Шифа во градот Газа, известува Анадолу.

Во соопштението се вели дека израелската војска вчера ја нападнала болницата Ал-Шифа со проектили, ракети и авиони.

Палестинската власт наведе дека израелските вооружени сили во текот на нападите ги погодиле последниот кат од одделението за интензивна нега, зградата на породилиштето и операционата сала.

Во продолжение се вели дека е гранатиран и просторот пред одделението за дијализа и дека таму избувнал пожар.

Во соопштението се вели дека во нападите е убиен пациент на интензивна нега и две предвреме родени бебиња.

Во овие напади животот го загубиле и петмина ранети поради прекинот на работата во операционите сали.

Палестинските власти наведуваат дека израелските војници директно ги гаѓале Палестинците кои ја напуштале зградата на болницата, а медицинските екипи не можеле да интервенираат поради интензивните напади.

Се истакнува дека израелската војска пукала во сѐ што се движело.

Локални извори информираа дека израелската војска под опсада ги држи болницата Ал-Шифа и околните подрачја на неколку болници во Појасот Газа.