Израелската Армија упадна во болницата Камал Адван во Газа, ги изнесува мажите и здравствениот персонал

АНКАРА (АА) - Израелската Армија денес упадна во болницата Камал Адван во северниот дел на Појасот Газа, откако ја опколи пред неколку дена, изјави претставник на Министерството за здравство, пренесува Анадолу.

Според зборовите на Ашраф ал-Кудра, портпарол на Министерството со седиште во Газа, израелската Армија ги собира Палестинците, вклучително и медицински персонал, на плоштадот на болницата.

Тој изрази страв дека Палестинците ќе бидат приведени или егзекутирани.

„Ги повикуваме ОН, Светската здравствена организација и Црвениот крст веднаш да дејствуваат за да ги спасат луѓето во болницата и да ја заштитат“, додаде Ал-Кудра.

Министерството за здравство на Газа вчера соопшти дека израелската Армија ја опколила болницата Камал Адван.

„Животите на пациентите во болницата се загрозени“, предупредуваат од Министерството.

- Израелски напади на Појасот Газа

Израел започна немилосрдни воздушни и копнени напади на Појасот Газа со неселективно бомбардирање на цивилни населби, станбени објекти, џамии, цркви и болници по неочекуваниот напад од страна на Хамас на 7 октомври.

На 24 ноември, во 07:00 часот по локално време, стапи на сила четиридневната хуманитарна пауза договорена меѓу Хамас и Израел, која потоа беше продолжена за уште три дена.

На 1 декември (петок), по завршувањето на хуманитарната пауза, израелската војска продолжи со своите интензивни напади низ Појасот Газа.

Од почетокот на израелските напади на Појасот Газа на 7 октомври досега се убиени приближно 18.205 Палестинци, а ранети се над 49.645 лица, објавија здравствените власти на палестинската енклава.

Официјалната бројка на загинати во Израел изнесува 1.200, при што, според зборовите на пилот на Израелските вооружени сили, можно е дел од загинатите Израелци да се жртва на примената на „Ханибаловиот протокол“ од страна на израелската војска.

„Ханибалова директива“ или „Ханибалов протокол“ е контроверзна процедура што ја користат израелските одбранбени сили (ИДФ) со цел да се спречи киднапирање на израелските војници од страна на непријателските сили. Според оваа директива, „киднапирањето мора да се запре со сите средства, дури и по цена на напад и елиминирање на киднапираните“. Овој протокол од страна на Израел е воведен во 1986 година.