Израелската армија соопшти дека продолжува да ја шири окупацијата на подрачјата во Газа

АЛ-КУДС/ЕРУСАЛИМ (АА) - Израелската армија објави дека продолжува да ја шири својата окупација во Газа, каде што 1,8 милиони луѓе се раселени и под блокада, како и дека започнала напади источно од Хан Јунис на југот на енклавата, јавува Анадолу.

Портпаролот на израелската војска, Даниел Хагари, рече дека ќе продолжат да ја прошируваат окупацијата на подрачјата во Газа.

„Израелската армија се движи кон секој комплекс на Хамас“, рече Хагари.

Наведувајќи дека „воздушната поддршка интензивно се користи за поддршка на копнените трупи“ Хагари рече дека сѐ уште има 137 заробеници во Појасот Газа: „заробениците се постојано во нашите мисли и постојано собираме разузнавачки информации за да не ги ризикуваме нивните животи“.

Хагари изјави дека продолжуваат копнените и воздушните напади на израелската армија врз Хезболах на север, и дека денес ракета истрелана од либанска територија погодила воено возило во градот Беит Хилел во регионот и има повредени.

Додека израелската армија се обидува да напредува на југ, оклопните и тенковските единици испукаа ракети и ја бомбардираа областа источно од градот Хан Јунис, чиј центар е густо населен.

Репортерот на Анадолу во Газа јави дека тенкови и оклопни единици на израелската армија се распоредени источно од Хан Јунис и дека регионот бил бомбардиран од земја и од воздух.

Десетици семејства од подрачјата каде што се засилени судирите во Хан Јунис се обидуваат да мигрираат во областите во центарот на Хан Јунис.

Под силен тенковски и артилериски оган е и регионот Деир ал Белах, североисточно од Хан Јунис.