ИСТАНБУЛ (АА) - Израелските воени авиони извршија нови воздушни напади врз неколку локации во јужен Либан денес, објавија либанските медиуми, пренесува Анадолу.

Државната Национална новинска агенција (ННА) соопшти дека воени авиони ги нападнале периферијата на Деир Серјан и Адаисе во округот Марџајун.

Дополнителни воздушни напади беа насочени кон градовите Талуса и Тулин, исто така на југ.

Во областа Набатија, израелските борбени авиони извршија напади врз градовите Џибчит и Набатија ал-Фавка, додека сличен напад се случи и во Завтар ал-Гарбија и областа помеѓу Аба и Џибчит. ННА, исто така, објави за воздушен напад врз населба во градот Набатија.

Одделно, едно возило било погодено на автопатот Захле - Карак, според агенцијата.

Под артилериски оган на израелските сили се најде и коритото на реката Литани кај местото Серира, во регионот Џезин, додаде националната агенција ННА.

Сè уште нема информации за жртви.

Ситуацијата ескалираше во Либан во понеделникот откако Хезболах нападна воен објект во северен Израел со ракети и беспилотни летала како одговор на тековните израелски воздушни напади и убиството на врховниот лидер на Иран, Али Хаменеи, во американско-израелскиот напад.

Израелската Армија како одговор започна серија воздушни напади, при што се убиени најмалку 72 лица, а речиси 450 беа повредени. Армијата, исто така, започна копнена инвазија во јужен Либан.

Израел постојано го прекршуваше договорот за прекин на огнот со Хезболах, потпишан во ноември 2024 година, извршувајќи речиси секојдневни напади во кои се убиени стотици луѓе, а повредени се и стотици други.

Израел ја започна својата офанзива против Либан во октомври 2023 година и ја ескалираше во целосна војна во септември 2024 година, при што се убиени повеќе од 4.000 луѓе, а околу 17.000 беа ранети.