ЕРУСАЛИМ / ИСТАНБУЛ (АА) – Десет израелски војници загинаа, а 309 други се повредени од почетокот на војната со Либан и Иран, соопшти Армијата денес, пренесува Анадолу.

Според податоците објавени од израелската Армија, од 2 март досега во јужниот дел на Либан загинале 10 војници.

Израелската Армија соопшти и дека во војната со Иран 309 војници биле ранети, од кои 23 се со тешки, а 55 со средно тешки повреди.

Според официјалните податоци, вкупно 935 израелски војници загинаа, а 6.424 се повредени од почетокот на војната во Газа во октомври 2023 година.

Регионалната ескалација продолжи откако Израел и САД започнаа офанзива против Иран на 28 февруари, во која досега загинаа повеќе од 1.340 луѓе, меѓу кои и тогашниот врховен лидер, ајатолахот Али Хамнеи.

Техеран возврати со напади со беспилотни летала и ракети насочени кон Израел, Јордан, Ирак и земјите од Персискиот Залив во кои се наоѓаат американски воени капацитети, предизвикувајќи жртви и инфраструктурна штета, нарушувајќи ги глобалните пазари и авиосообраќајот.

Израелското Министерство за здравство соопшти дека најмалку 6.286 лица се повредени од почетокот на војната со Иран.

Иако Министерството не објави официјален број на загинати, израелскиот Институт за студии за национална безбедност проценува дека во конфликтот досега животот го загубиле 29 лица.