Израел уби повеќе хуманитарни работници за 6 месеци во Газа отколку што загинаа во светот во последните 30 години

ИСТАНБУЛ (АА) - Израел уби повеќе хуманитарни работници за 6 месеци во Појасот Газа отколку што загинаа во светот во последните 30 години, се наведува во извештајот на Базата на податоци за безбедноста на хуманитарните работници (AWSD), известува Анадолу.

Откако Бригадите Ал-Касам, военото крило на Хамас, започнаа напад на 7 октомври минатата година, најмалку 203 хуманитарни работници се убиени во израелските напади, се наведува во извештајот.

Генералниот секретар на Обединетите нации (ОН), Антонио Гутереш, рече дека ситуацијата е „несовесна“.

Минатата недела Гутереш изрази загриженост поради постојаното попречување на хуманитарните работници на ОН да ја извршуваат својата должност во опколениот Појас Газа, особено во северните делови на палестинската енклава.

Американската хуманитарна организација за храна Светска централна кујна (СЦК) потврди дека 7 нејзини хуманитарни работници се убиени во израелскиот напад изведен во понеделникот во Појасот Газа.

Хуманитарните работници биле државјани на Австралија, Полска, Велика Британија и Палестина, како и едно лице со двојно државјанство на САД и Канада.

ОН соопштија дека го прекинуваат ноќното движење на својот персонал најмалку 48 часа по нападот.

Портпаролот на германското МНР, Себастијан Фишер, рече дека Берлин „очекува од израелската Влада да ги приспособи своите операции за цивилите да бидат подобро заштитени, а тоа, се разбира, особено се однесува на жените и мажите од хуманитарната помош“.

„Израелската Влада мора брзо и темелно да го истражи овој ужасен инцидент“, напиша Аналена Баербок, министерката за надворешни работи на Германија, на социјалната мрежа Х.

Канада го осуди нападот врз хуманитарните работници на СЦК и побара целосна истрага.

Ентони Албаниз, премиерот на Австралија, побара одговорност од Израел во врска со инцидентот.

„За смртта на хуманитарните работници, што е потполно неприфатливо, Австралија очекува целосна одговорност“, рече Албаниз.

И САД го повикаа Израел брзо да спроведе истрага.

„Хуманитарните работници мора да бидат заштитени додека ја доставуваат помошта што е очајно потребна“, изјави Адриен Вотсон, портпаролката на Советот за национална безбедност на Белата куќа.

Полска побара објаснение од Израел поради смртоносниот напад врз хуманитарните работници, од кои еден беше полски државјанин.

Анджеј Шејна, заменик-министерот за надворешни работи на Полска, изјави: „Министерот Радослав Сикорски веднаш контактираше со израелскиот амбасадор и побара објаснување.“