ЕРУСАЛИМ / ИСТАНБУЛ (АА) - Израелската армија тврди дека минатата недела убила 40 припадници на Хамас што биле заробени во Рафа, во јужниот дел на Појасот Газа, јавува Анадолу.

Доцна синоќа армијата соопшти дека продолжува да ги интензивира напорите за уништување на преостанатите тунели во источна Рафа, со цел да се елиминираат вооружените милитанти внатре.

„Минатата недела беа елиминирани повеќе од 40 милитанти во тунелите“, се вели во соопштението.

Израелската армија претходно тврдеше дека во Рафа убила и привела други борци на Хамас.

Од Хамас немаше веднаш коментар за тврдењето на армијата.

Според извештаите на израелските медиуми, околу 200 борци на Хамас се заробени во подземни тунели во Рафа, а Тел Авив сè уште не одговорил на барањата на Хамас и медијаторите да им овозможи безбеден премин до областите под контрола на групата.

Градот Рафа се наоѓа во жолтата зона, област што сè уште е окупирана од израелската армија во Појасот Газа.

Договорот за прекин на огнот, посредуван од Египет, Катар и Турција, а поддржан од САД, стапи на сила на 10 октомври меѓу Израел и Хамас во Појасот Газа.

Првата фаза од договорот за прекин на огнот вклучува ослободување на израелски заложници во замена за палестински затвореници. Планот, исто така, предвидува обнова на Газа и воспоставување нов управувачки механизам без Хамас.

Израел уби повеќе од 70.000 Палестинци, повеќето жени и деца, а повреди речиси 171.000 во нападите врз Газа од октомври 2023 година досега.