Израел се закани дека ќе ги депортира жителите на Газа доколку флотилата се усидри во Газа како поддршка на Палестинците

Израелскиот министер за одбрана Израел Кац се закани дека доколку флотилата се приближи до брегот на Газа во знак на поддршка на Палестинците, ќе ги заплени чамците од флотилата и ќе ги депортира жителите на Газа, известува Анадолу.

Според писменото соопштение на израелското Министерство за одбрана, Кац најавил дека ќе бидат запленети чамците кои се приближуваат до брегот на Појасот Газа за да им дадат поддршка на Палестинците.

„Секој што ќе дојде да демонстрира на брегот на Газа, ќе го пратиме во Газа“, се вели во соопштението, додавајќи дека конфискуваните чамци ќе се користат за депортирање на жителите на Газа.

Во соопштението се истакнува дека Кац ѝ дал инструкции на израелската Армија да дозволи флотилата која ги поддржува Палестинците да стигне до бреговите на Газа, и наложил пропалестинските активисти да бидат однесени на копното на Газа, а запленетите чамци да бидат префрлени во пристаништето Ашдод за да се користат за евакуација на Палестинците кои сакаат да ја напуштат Газа.

„Ерусалим пост“ објави дека Кац денеска одржал состанок со високи претставници на израелската Армија и израелската домашна разузнавачка агенција Шин-Бет.

На средбата било констатирано дека на брегот на Газа се очекува да пристигне флотила за поддршка на Палестинците во Појасот Газа.

Минатиот април, два брода со хуманитарна помош тргнаа од пристаништето Ларнака на Грчката администрација на Јужен Кипар за да достават хуманитарна помош до луѓето од Појасот Газа, кои се соочуваат со глад и катастрофа поради блокадата од море, копно и воздух.