Израел: Поранешни офицери на Мосад се приклучија на повиците да се запрат нападите врз Газа поради размена на заробеници

ЕРУСАЛИМ (АА) - Поранешни офицери на Мосад во Израел им дадоа поддршка на резервистите кои беа избркани од Армијата поради барањето за прекин на нападите врз Појасот Газа со цел размена на заробеници, известува Анадолу.

Весникот „Ерусалим пост“ објави дека околу 250 поранешни офицери на Мосад, вклучително и тројца поранешни шефови на Мосад, поранешен заменик-шеф и високи извршни директори, се приклучија на повиците за прекин на нападите врз Газа за да можат заробениците веднаш да се вратат дома.

Во објавеното писмо, поранешните членови на Мосад повикаа на прекин на нападите врз Газа поради размената на заробеници и се солидаризираа со активните пилоти кои беа избркани од Армијата, изразувајќи загриженост за иднината на земјата.

„Се придружуваме на повикот за итна акција за постигнување договор со кој ќе се вратат сите 59 заробеници дома без одлагање, дури и по цена да се запре војната“, се вели во писмото напишано од поранешните офицери на Мосад.

Тврдејќи дека продолжувањето на нападите врз Газа ги става во опасност животите на затворениците и војниците, поранешните членови на Мосад во писмото наведуваат:

„Треба да се процени секоја можност за да се постигне договор што ќе им стави крај на страдањата“.

Поранешни директори на Мосад кои го потпишале писмото се Дани Јатом, Ефраим Халеви и Тамир Пардо.

– Во израелската Армија растат повиците да запрат нападите врз Газа

Речиси 1.000 пилоти и резервисти од израелските воздухопловни сили, од кои некои се пензионирани, објавија писмо во кое повикуваат на прекин на нападите врз Газа.

Началникот на Генералштабот, Ејал Замир, соопшти дека ја одобрил одлуката на командантот на воздухопловните сили Томер Бар да ги отпушти војниците од Армијата кои потпишале писмо во кое повикуваат на прекин на нападите врз Газа.

По пилотите и резервните војници од воздухопловните сили, повеќе од 150 пензионирани офицери од морнарицата и резервни војници од оклопните единици, објавија писмо во кое бараат прекин на нападите врз Газа поради размена на заробениците.

Стотици резервисти од израелската воена разузнавачка единица „8200“ потпишаа и писмо во кое бараат прекин на нападите врз Газа.

Писмото на припадниците на воздухопловните сили го поддржаа и академици и воени лекари.

Израелскиот премиер Бенјамин Нетанјаху ги опиша активните и пензионирани војници кои повикаа на прекин на нападите врз Појасот Газа поради размената на заробеници како „куп плевел“ и ги обвини дека се обидуваат да ја соборат неговата коалициска влада.