Израел го ослободи палестинскиот новинар Амарне, кого го приведе пред девет месеци

РАМАЛА (АА) - Израел го ослободи палестинскиот новинар Муаз Амарна по поминати девет месеци во притвор без подигнување обвинение, изјави за Анадолу неговиот братучед Осајд Амама.

„Муаз Амарна е ослободен на контролниот пункт Ал-Дахирија во близина на градот Хеброн на југот на Западниот Брег“, рече неговиот роднина.

Тој истакна и дека новинарот е во лоша здравствена состојба и дека итно е пренесен во болница на лекарски прегледи.

„Муаз побара да не биде прегрнуван и да биде однесен на лекарски прегледи поради сомневање за повеќе болести предизвикани од затворските услови“, додаде Осајд Амарна.

Здружението на палестински затвореници објави дека Муаз Амарна (36) бил злоупотребуван и мачен во затворот Мегидо во северен Израел.

Невладината организација вели дека палестинскиот новинар боледува од хроничен дијабетес, кој се влошил поради условите во затворот.

Според палестинските податоци, најмалку 158 палестински новинари се убиени во израелските напади во Појасот Газа од 7 октомври минатата година.

Комитетот за заштита на новинарите со седиште во Соединетите Американски Држави (САД) документира дека од истиот датум, Израел притворил 51 палестински новинар и медиумски работник во Газа и на Западниот Брег.

Прекршувајќи ја резолуцијата на Советот за безбедност на Обединетите нации со која се бара итен прекин на огнот, Израел се соочи со меѓународна осуда поради неговата континуирана брутална офанзива врз Појасот Газа, започната по нападот на палестинската група на отпорот Хамас на 7 октомври минатата година.