Alyssa Mcmurtry
11 Март 2024•Ажурирај: 12 Март 2024
ОВИЕДО (АА) - Иако гласачите во Португалија им дадоа значителна поддршка на десно ориентираните партии на изборите вчера, двете водечки политички партии се речиси изедначени по преброените 99 отсто од гласовите, па останува неизвесно што ќе ја однесе победата на изборите, пренесува Анадолу.
По речиси сите пребројани гласови, конзервативниот Демократски сојуз има 77, а Социјалистичката партија 75 мандати во Парламентот. Крајно десничарската партија Чега има 46 места.
Во текот на кампањата водечките партии говореа дека ќе ја избегнат можноста Чега да влезе во власта. За време на дебатата кандидатот на социјалистите Педро Нуно Сантос рече дека ќе го поддржи кандидатот на Демократскиот сојуз, Луис Монтенегро, доколку неговата партија освои најмногу места.
Поранешниот португалски премиер Антонио Коста синоќа изјави дека е прерано за објавување на резултатите од изборите додека не бидат пребројани гласовите од странство.
Меѓутоа, Демократскиот сојуз прогласи победа и рано утрово објави дека Социјалистичката партија загубила.
Анкетите пред изборите го потценија влијанието на партијата Чега, која во 2022 година освои 12 места, додека вчера нејзиниот резултат се зголеми за повеќе од четирипати, со најмалку 46 места и 18 отсто од гласовите.
Предвремените избори во Португалија беа распишани во ноември откако премиерот Коста поднесе оставка бидејќи членовите на неговиот близок круг беа под истрага за корупција.
Пред две години Коста победи со историско мнозинство, надминувајќи ги потребните 116 места за мнозинство во Парламентот.
Во меѓувреме, членовите на Демократскиот сојуз мораа да се справат и со сопствениот корупциски скандал.
Чега, што на португалски значи „Доста“, на изборите настапи под слоганот „Да ја исчистиме Португалија“. Партијата на крајната десница, основана во 2019 година, ги искористи неодамнешните корупциски скандали на водечките партии.
Меѓутоа, нејзиниот лидер Андре Вентура е обвинет и за расизам и ксенофобија.
„Сѐ уште не знаеме какви ќе бидат резултатите, но едно знаеме сигурно - двопартискиот систем е мртов во Португалија“, рече Вентура рано утринава, додавајќи дека Португалците избрале десничарска влада со Чега во неа.
Економските прашања, исто така, беа во средиште на кампањата. Со некои од најниските плати во Европската Унија, многу жители на Португалија се борат со инфлацијата и растечките трошоци за живот, а цените на становите се главен проблем.
