ГАЗА (АА) - Во градот Кан Јунис во јужниот дел на Газа, Селим ел-Бејук, кој повеќе од 20 години се занимава со слаткарство, покрај сите тешкотии продолжува да ги одржува традициите поврзани со Рамазан, месецот на постот кај муслиманите, и да го подготвува традиционалниот таш кадаиф, кој е неизоставен дел од трпезите, пишува Анадолу.

Ова ќе биде трета година по ред жителите на Газа да го дочекаат месецот Рамазан со тага, по повеќе од две години континуиран геноцид.

Според Палестинците, прекинот на огнот во Газа, кој стапи на сила на 10 октомври минатата година, само го запре геноцидот, но војната и понатаму продолжува.

Израел продолжува со окупацијата во областа на „Жолтата линија“, секојдневно убива Палестинци, и не дозволува влез на доволен број камиони со хуманитарна помош.

Отворањето на граничниот премин Рафа, кaко дел од обврските од првата фаза од договорот, постојано се одложуваше под изговор за пронаоѓање на останките на последниот израелски затвореник.

По пронаоѓањето на останките на затвореникот, во јануари беше соопштено дека втората фаза од договорот започнува и граничниот премин Рафа беше отворен. Меѓутоа, преку границата се дозволени лимитиран број премини, а и доставувањето хуманитарна помош е исто така органичено.

Според протоколот за хуманитарната помош, секојдневно во Газа треба да влегуваат по 600 камиони со хуманитарна помош и 50 камиони со гориво, но поради израелските блокади ова количество е ограничено на 260 камиони, со што е оневозможено подобрување на хуманитарната состојба.

Шаторите и куќите пред уривање сѐ уште се секојдневие на жителите на Газа, а можностите за доаѓање до храна се оскудни. И покрај тешкотиите тие не ги запоставуваат подготовките за Рамазан, месец што има посебно значење во исламскиот свет.

- Таш кадаифт се пече на дрва наместо на гас -

Селим ел-Бејук (54), кој работи во чаршијата во Кан Јунис, посветено продолжува со традицијата за изработка на таш кадаифи, неизоставен десерт за рамазанските трпези.

За дописникот на АА тој раскажа дека и покрај војната, присилните раселувања и миграциите, неговото место сè уште е во чаршијата, но снабдувањето продукти, како брашно и сода бикарбона, за изработка на таш кадаиф е голем предизвик. Поради малото количество гас што влегува во Газа, десертот мора да се пече на дрва.

Работилницата за производство е оштетена во нападите, но се обидуваат да ја санираат штетата. „Таш кадаиф е традиционален десерт за Рамазан, за време на месецот побарувачката е поголема. Секој ден произведуваме и продаваме 200-300 килограми таш кадаиф“, изјави тој.

Додаде дека поради намалената куповна моќ на луѓето, годинава цената на таш кадаифот е намалена од 15 на 10 шекели.

- Изработува слатки на границата до „Жолтата линија“ -

Бејук, кој работи во близина на „Жолтата линија“ (област под окупација на израелските сили), рече дека и покрај опасностите е невозможно да се замине од својот дом и од Газа: „Ова е земјата на нашите предци. Тука сме на наша земја, покрај нашите семејства, не може да заминеме. Дури и еден сентиметар од оваа земја вреди повеќе од цела Европа.“

„Порано чаршијата ја посетуваа многу луѓе, но поради уништувањето и нападите, луѓето се плашат да дојдат“, додаде Бејук.

Тој изрази надеж дека со почетокот на втората фаза од договорот, со повлекувањето на Израел од Газа, и со повторното безбедно живеење чаршијата ќе оживее.

- И покрај пустошот од нападите, Рамазан е месец на благосостојба и надеж -

Саид Халеф, жител на Кан Јунис што купува таш кадаиф од Бејук, со носталгија се потсетува на старите времиња, кога чаршијата била полна со луѓе, толку што не можеле да се разминат на калдрмата.

„Таш кадаифот е плодот на Рамазан“, рече Халеф, потсетувајќи на значењето на овој десерт за време на месецот на постот. Посака Рамазан да донесе благосостојба, мир и безбедност, чаршијата повторно да се наполни со луѓе и раселените да се вратат.

Истовремено, Халеф посочи дека чаршијата се наоѓа само 300-400 метри од „Жолтата линија и додаде:
„Сакаме Израел да се повлече и од окупираната 'Жолта линија' и втората фаза од договорот навистина да се спроведе. Велат дека втората фаза почнала, но тоа не е точно. Звукот на зенане (назив што Палестинците го користат за израелските дронови и нивниот звук) продолжува, нападите продолжуваат.“