ИСТАНБУЛ (АА) - Украинскиот претседател Владимир Зеленски денес соопшти дека министерот за одбрана Рустем Умеров ќе ја предводи делегацијата на Украина во планираната втора рунда директни преговори со Русија утре во Истанбул, јавува Анадолу.

„Правиме сè за да ја заштитиме нашата независност, нашата држава и нашиот народ. Ги изложив задачите, а исто така ги дефинирав и нашите позиции пред состанокот во Истанбул утре“, рече Зеленски на X.

„Прво - целосен и безусловен прекин на огнот. Второ - ослободување на затворениците. Трето - враќање на киднапираните деца. И со цел да се воспостави сигурен и траен мир и да се осигура безбедност, подготовка на состанок на највисоко ниво. Клучните прашања можат да се решат само од лидерите.“

Умеров ја предводеше делегацијата на Украина за време на првата рунда преговори во турската метропола на 16 мај. Преговорите доведоа до најголемата размена на затвореници во конфликтот кој трае повеќе од три години, во која беа разменети 1.000 затвореници од секоја страна.