Meiramgul Kussainova
12 Април 2022•Ажурирај: 13 Април 2022
КИЕВ (АА) - Претседателот на Украина, Владимир Зеленски, истакна дека руските војници намерно поставиле голем број експлозивни направи додека се повлекувале од северните региони на неговата земја и дека тоа треба да се смета за воено злосторство, пренесува Агенција Анадолија (АА).
Во својата видеопорака, во која го оценува 47-от ден од војната, Зеленски нагласи дека продолжуваат работите за деминирање во ослободените северни региони на Украина.
Истакнувајќи дека најмалку илјада експлозивни направи се деактивираат секој ден во споменатите региони, Зеленски рече: „Напаѓачите оставија мини насекаде. На улиците, во куќите, во автомобилите. Тие се намерно поставени за враќањето во областите по инвазијата да биде што е можно поопасно“.
Тој истакна дека неговата земја стана една од најминираните области во светот поради акциите на Руската армија: „Тоа што Русите поставуваат мини во окупираните територии треба да се смета за воено злосторство. Затоа што ова се прави за да се убијат или осакатат што е можно повеќе луѓе дури и после нивното повлекување. Ваквите дејствија се прават по директна наредба.“
Покрај тоа, Зеленски нагласувајќи дека Русија најавила дека може да употреби хемиско оружје против бранителите на Мариупол рече: „Ние го сфаќаме ова многу сериозно. Тоа значи дека е неопходно да се одговори многу посилно и побрзо на руската агресија.“
