Ali H. M. Abo Rezeg
03 Ноември 2020•Ажурирај: 04 Ноември 2020
РАМАЛАХ (АА) - Израел го затвори затворот „Гилбоа“, каде што се наоѓаат 360 палестински затвореници, поради ширењето на коронавирусот меѓу затворениците, јавува Агенција Анадолија (АА).
Од израелската затворска служба се вели дека сите влезови и излези од затворот се затворени додека затворениците не бидат тестирани, а објектот е дезинфициран.
Палестинските медиуми јавуваат дека над 70 палестински затвореници се заразени со Ковид-19.
Во соопштението на Палестинското здружение на затвореници (PPS) се вели дека израелските власти започнале да ги префрлаат заразените затвореници во затворот „Салмон“ за да бидат изолирани.
Се вели дека затворениците пројавиле симптоми на вирусот во неделата, но затворските власти го третирале вирусот како грип, иако многумина затвореници имале многу висока температура.
Челникот на Палестинското здружение на затвореници, Кадура Фарес, ги повика меѓународните судски институции и Светската здравствена организација (СЗО) да извршат притисок врз Израел итно да ги ослободи сите жени, деца и стари лица од затворот.
Меѓу заразените со Ковид-19 се наоѓа и Абас ал Сајед, лидерот на Хамас, кој служи 35-годишна казна во затворот „Гилбоа“.
Според палестински проценки, во израелските затвори има 4.400 палестински притвореници, од кои 39 жени, 155 деца и околу 350 лица кои се држат под т.н. административен притвор, израелска практика што овозможува држење во притвор на Палестинците без обвинение и судење.
