Запрен железничкиот сообраќај во Германија, започнат тридневен штрајк

БЕРЛИН (АА) - Германските железничари денес започнаа тридневен штрајк поради спорот со националниот железнички оператор околу платите и работното време, јавува Анадолу.

Државната компанија Дојче Бан соопшти дека штрајкот на синдикатот на машиновозачите на Германски железници (GDL) ќе предизвика голем прекин на меѓуградските, регионалните и приградските возови меѓу среда и петок.

„Возниот ред при итни случаи обезбедува само многу ограничени железнички услуги на меѓуградски, регионални и S-Bahn услуги. Ве молиме воздржете се од непотребно патување за време на штрајкот и одложете го вашето патување за друго време“, се вели во соопштението.

Лидерот на синдикатот, Клаус Везелски, остро го критикуваше раководството на Дојче Бан и рече дека најновата понуда на железничкиот оператор е „провокација“ и далеку од исполнувањето на нивните барања.

„Доколку до петок нема нова понуда, ќе направиме пауза, а потоа ќе преземеме чекори за следниот штрајк“, изјави тој за државната телевизија АРД набрзо откако утрово машиновозачите престанаа со работа.

Германска железница инсистира на зголемување на платите од 555 евра месечно и еднократна премија за компензација на инфлацијата до 3.000 евра. Синдикатот бара и намалување на работното време на работниците во смени, од 38 на 35 часа неделно, без намалување на платите.