ИСТАНБУЛ (АА) – Објекти во иранската престолнина Техеран биле запалени, а антивладините демонстрации се шират низ целата земја, објави денес Би-би-си Персиан​​​​​​​, пренесува Анадолу.

Медиумот соопшти дека верификувал видеоснимки на кои се гледаат запалени џамии во населбите Голаак и Саадат Абад во Техеран.

Повикувајќи се на организации за човекови права, Би-би-си Персиан наведе дека незадоволството поради колапсот на иранската валута предизвикало демонстрации во повеќе од 100 градови и населени места низ 31 провинција во Иран.

Иран е потресен од бран протести од минатиот месец, почнувајќи од 28 декември во Големата чаршија во Техеран, поради наглото намалување на вредноста на иранскиот ријал и влошувањето на економските услови. Подоцна демонстрациите се проширија во неколку градови.

Според интернет-набљудувачот НетБлокс, утринава во земјата немало интернет 12 часа „по воведувањето национален прекин на интернетот од страна на властите“, со цел „задушување“ на протестите.

Иранските власти не објавија официјални податоци за жртвите. Сепак, Агенцијата за вести на активистите за човекови права во извештајот од средата наведе дека најмалку 38 лица биле убиени, меѓу кои и четворица припадници на безбедносните сили. Оваа агенција пријави и десетици повредени и 2.217 приведени лица.

Новинската агенција Тесним соопшти дека бројот на повредени полицајци за време на протестите се зголемил на 568, а 66 припадници на паравоените сили Басиж, исто така, биле повредени.