Западен Брег: Во напад на израелските сили повредени девет Палестинци

РАМАЛА (АА) – Најмалку девет Палестинци се повредени во напад на израелската армија на окупираниот Западен Брег, јавува Агенција Анадолија (АА).

Израелските сили извршија рација во градот Кабатија, јужно од Џенин, што предизвика локални протести и немири.

Јани Абу Џока, раководител на болницата „Ибн Сина“ во Џенин, рече дека девет повредени лица се примени во болницата за медицинска помош.

Во соопштението на израелската војска се вели дека вооружен палестински напаѓач, забарикадиран во станбена зграда, отворил оган врз израелските војници за време на операцијата во областа.

Војската соопшти дека уапсила девет палестински осомничени и запленила две пушки М-16.

Израелската војска често спроведува опсежни кампањи за апсење низ окупираниот Западен Брег и источен Ал Кудс (Ерусалим) под изговор дека трага по „осомничени“ Палестинци.

Според институциите кои се занимаваат со прашања на затворениците, во затворите во Израел во моментов има 4.650 Палестинци.