Ekipa
27 Ноември 2021•Ажурирај: 28 Ноември 2021
ЖЕНЕВА (АА) - Светската трговска организација (СТО) денес ја одложи министерската конференција по „појавата на особено преносливиот сој на вирусот Ковид-19“, кој принуди неколку земји да воведат ограничувања за патување, јавува Агенција Анадолија (АА).
„Генералниот совет на СТО се согласи да ја одложи претстојната министерска конференција по ширењето на особено преносливиот сој на коронавирусот, поради кој неколку влади воведоа ограничувања за патување што би спречило многу министри да дојдат во Женева“, соопшти Светската трговска организација по вонредниот состанок.
На состанокот на министри требаше да се разговара за прашања како лиценцирањето и правата на интелектуална сопственост околу вакцините и другите клучни набавки за борба против пандемијата што предизвика хаос во текот на последните скоро две години во меѓународниот бизнис и трговија.
На 12. Конференција на министри на СТО, што требаше да се одржи во Женева од 30 ноември до 3 декември, се очекуваше учество на 4.000 министри и други претставници од областа на трговијата.
Сепак, најавата за ограничувањата за патување и условите за карантин во Швајцарија и други европски земји придонесоа Организацијата да свика итен состанок на сите членки на СТО за да ги информира за ситуацијата.
„Ова не беше лесна препорака за давање“, рече генералната директорка на СТО, Нгози Оконџо-Ивеала, откако телото што раководи со меѓународната трговија го одложи планираниот министерски состанок по втор пат за две години.
Вчера, Светската здравствена организација (СЗО) ја нарече „варијанта за загрижување“ новата варијанта на Ковид-19 со многу мутации откриена во Јужна Африка.
Швајцарија објави дека ќе ги забрани сите директни летови од јужна Африка, откако СЗО соопшти дека Омикрон е потенцијално поризична варијанта.
И други европски земји, но и САД, исто така го стопираа воздушниот сообраќај од јужна Африка поради загриженоста за варијантата Омикрон.
Членките на ЕУ се согласија да воведат ограничувања за седум африкански земји - Боцвана, Есватини, Лесото, Мозамбик, Намибија, Јужноафриканската Република и Зимбабве.
Оконџо-Ивеала истакна дека одложувањето на состанокот на Светската трговска организација е во согласност со швајцарските здравствени протоколи и не назначи друг датум за состанокот.
