За време на демонстрации во Газа е убиен Палестинец

ГАЗА (АА) - Во интервенција на израелските војници за време на мирните протести „Марш за големо враќање“, кои Палестинците ги организираат долж границата со Газа, загина Палестинец, јавува Anadolu Agency (AA).

Од палестинското Министерство за здравство во Газа е соопштено дека 20-годишниот Мухамед Џихад Џевдет е ранет за време на вчерашните демонстрации и дека им подлегна на повредите.

Палестинците на 30 март на границата на Појасот Газа и Израел организираат мирни демонстрации под името „Марш за големото враќање“. Демонстрантите бараат враќање на територијата од која се избркани, како и укинување на блокадата на Газа воведена во 2006 година.

Во интервенцијата на израелските војници на протестите од 30 март беа убиени повеќе од 230 Палестинци. Во истиот период во воздушните и тенковските напади на Газа се убиени најмалку 14 Палестинци.

Палестинците секоја година го одбележуваат Денот на земјата, за да се присетат на 30 март 1976 година, кога Израел од нив одзеде илјадници хектари земјиште.

По тој повод, Палестинците во земјата, но и низ светот, организираат различни активности за да се присетат на окупацијата која трае со децении, но и на невинонастраданите сонародници.

Се одржуваат и протестни маршеви во знак на сеќавање на Палестинците убиени во 1976 година на протестите против експанзијата на Израел на палестинска територија.

На голем број собири се осудува политиката на населување на палестинските територии од Израел, нагласувајќи дека Денот на земјата треба да ја потсети меѓународната заедница на нејзината одговорност кога станува збор за Палестина.

Палестинците сметаат дека одговорност на меѓународната заедница и заштита на правата на палестинскиот народ е основање независна држава Палестина и враќање на палестинските бегалци во татковината.

Од 1993 година Израел го удвои бројот на доселениците на Западниот Брег. Повеќе од половина милион Израелци живеат на окупираната палестинска територија. Четириесет отсто од Западниот Брег се наоѓа под израелска контрола. Sидот на раздвојување долг 78 километри, кој Израел нелегално го изгради, раздвојува повеќе од 850.000 Палестинци.

Денот на земјата се одбележува во Палестина од 1976 година, и тоа, на некој начин, е симбол на отпорот на Палестинците за да ја добијат назад својата земја.