Abdullah Tevge
02 Март 2022•Ажурирај: 03 Март 2022
ЛАВОВ (АА) ‒ Железничката станица во западниот украински град Лавов утринава беше преполна со луѓе кои се обидуваат да ја напуштат земјата поради војната со Русија, јавува Агенција Анадолија (АА).
Многу доброволци им поделија топли пијалаци и храна на оние што чекаа возови да ги однесат на безбедно во Полска.
„Сиве овие луѓе доаѓаат овде само за да си помогнат еден на друг. Покрај тоа, многу луѓе од различни земји доаѓаат овде да нѐ поддржат“, изјави за АА, Андриј Андријук, еден од волонтерите.
Во градот, каде што започнува полициски час од 22:00 до 6:00 часот наутро, многу луѓе ја поминуваат ноќта собирајќи се околу огнови запалени надвор од станицата.
Русија ја започна својата офанзива врз Украина на 24 февруари. Според проценките на ОН, загинаа најмалку 136 цивили, вклучително и 13 деца. Околу 400 други се повредени, меѓу кои 26 деца.
Нападите низ целата земја доведоа дo тоа 680.000 лица да избегаат од Украина во соседните земји, според меѓународната организација.
Русија го засили своето воздушно и артилериско бомбардирање, особено врз главниот град Киев и вториот по големина град во Украина, Харков, каде што голема експлозија го потресе Плоштадот на слободата.
Во Харков, во близина на руската граница, живеат околу 1,5 милиони луѓе, додека населението на Киев е речиси 3 милиони.
