Aysu Biçer
05 Јули 2025•Ажурирај: 07 Јули 2025
ЛОНДОН (АА) - Европската Унија се очекува да претстави серија можни казнени мерки против Израел следната недела како одговор на неговите дејствија во Газа, иако поделбите меѓу земјите членки го прават нивното усвојување потешко, изјавија официјални претставува, јавува Анадолу.
Интерниот ЕУ преглед на трговскиот договор на Израел со блокот, добиен од „Еурактив“ минатиот месец, покажа „индикации за прекршување“ на обврските за човекови права наведени во договорот.
Како одговор, Европската служба за надворешни работи (ЕЕАС), дипломатската гранка на ЕУ, се подготвува да им претстави формален документ со опции на амбасадорите во среда, според официјални претставници запознаени со темата.
Документот ги наведува петте потенцијални мерки, целосно или делумно суспендирање на договорот за асоцијација меѓу ЕУ и Израел, таргетирани санкции врз израелски владини министри, воениот персонал или доселеници-екстремисти, трговски ограничувања, ембарго за оружје и суспендирање на научната соработка.
Иако многу од овие опции беа неформално дискутирани во последните месеци, ова е прв пат тие формално да бидат презентирани во писмена форма.
Министрите за надворешни работи на ЕУ ќе дискутираат за документот на нивниот состанок во Брисел на 15 јули, последниот пред летната пауза. Тој датум е и неформален рок за Израел да покаже подобрување на хуманитарната ситуација во Газа.
„Првата цел е да се промени однесувањето на терен. Доколку ситуацијата не се подобри, тогаш можеме да разговараме за понатамошни мерки“, изјави минатиот месец шефицата за надворешна политика на ЕУ, Каја Калас.
Техничка делегација на ЕУ, предводена од претставникот за Блискиот Исток, Кристоф Биго, неодамна го посети Израел за разговори, иако претставниците на ЕУ изразија скептицизам во врска со постигнувањето конкретни резултати.
Израел остро го критикуваше ЕУ прегледот, нарекувајќи го „скандалозен“ и „полн со методолошки недостатоци“.
Иако Брисел вели дека процесот има за цел да помогне во ублажувањето на страдањата на цивилите во Газа, длабоките поделби меѓу земјите членки продолжуваат.
Суспендирањето на договорот за асоцијација меѓу ЕУ и Израел би барало едногласно одобрување од сите 27 земји членки, исход што се смета за неверојатен поради противењето од Германија, Чешка и Унгарија. Се верува дека Европската комисија, која ја надгледува трговската политика, дека исто така ќе се спротивстави на широки економски мерки.
Слично, и ембаргото за оружје се смета за неизводливо, особено со оглед на улогата на Германија како најголем европски снабдувач на Израел со оружје.
Таргетираните санкции врз поединци, пак, се сметаат за политички најизводлива опција. Дипломатите на ЕУ истакнуваат дека земји, меѓу кои Велика Британија, Австралија, Канада, Нов Зеланд и Норвешка, веќе вовеле слични мерки.
