ЕУ повика на прекин на судирите на линијата на фронтот меѓу Азербејџан и Ерменија

БРИСЕЛ (АА) - Европската Унија (ЕУ) повика на итен прекин на судирите од линијата на фронтот меѓу Азербејџан и Ерменија, пренесува Агенција Анадолија (АА).

Во својата писмена изјава, Жозеп Борел, високиот претставник на ЕУ за надворешни односи и безбедносна политика, изрази жалење за воените и цивилни жртви на фронтот во Нагорно Карабах.

„ЕУ повикува на итен прекин на конфликтите, намалување на тензиите и строго почитување на примирјето“, рече Борел, додавајќи дека страните итно треба да се вратат на преговори без предуслови под покровителство на Минската група на Организацијата за безбедност и соработка во Европа (ОБСЕ).

Од Министерството за одбрана на Азербејџан беше соопштено дека ерменската Армија утрово извршила широка провокација по должината на фронтот и со артилерија ги нападнала позициите на азербејџанската Армија и цивилните населби.

Исто така беше наведено дека Командата на азербејџанската Армија одлучила да спроведе контранапад по целиот фронт за да се осигури безбедноста на цивилното население.