Ердоган ја повика ЕУ да ја одигра својата улога во продолжувањето на договорот за извоз на жито

АНКАРА (АА) - Турскиот претседател Реџеп Таип Ердоган ја повика Европската Унија (ЕУ) да ја одигра својата улога во продолжувањето на договорот за извоз на жито од украинските пристаништа на Црното Море, јавува Агенција Анадолија (АА).

Ердоган го упати повикот до ЕУ на состанокот зад затворени врати со францускиот колега Емануел Макрон на маргините на самитот на Г20 во Индонезија, каде што двајцата лидери разговараа за билатералните односи и регионалниот развој.

„Ердоган изјави дека коридорот за жито повторно почнал да функционира по интензивните напори на Туркије“, се вели во соопштението на Одделот за комуникации при турското Претседателство.

Туркије, Обединетите нации, Русија и Украина на 22 јули во Истанбул потпишаа договор за обновување на извозот на жито од три украински пристаништа на Црното Море, што беше суспендиран по почетокот на војната меѓу Москва и Киев во февруари.

Страните преговараат за можно продолжување на договорот, што истекува на 19 ноември, со руско жито и ѓубриво.

Турскиот претседател, исто така, му порача на Макрон дека Грција треба да се охрабри да се вклучи во „чесен и значаен дијалог“.

Ердоган рече дека развојот на соработката меѓу Анкара и Париз во одбранбениот и енергетскиот сектор, како и во трговијата, е од заеднички интерес.

Макрон му изрази сочувство на Ердоган за смртоносниот терористички напад во неделата во Истанбул, во кој загинаа шест лица, а 81 беа повредени.