Zehra Nur Düz,Rabia İclal Turan
30 Септември 2023•Ажурирај: 01 Октомври 2023
ВАШИНГТОН (АА) - Извршниот директор на Тесла и Спејс Икс, Елон Маск, синоќа соопшти дека следната година ќе присуствува на најголемиот технолошки и авијациски настан во Туркије, ТЕХНОФЕСТ, јавува Анадолу.
Заблагодарувајќи му се на турскиот претседател Реџеп Таип Ердоган за поканата, Илон Маск се огласи преку платформата X: „Со нетрпение очекувам лично да присуствувам следната година, како и да разговараме за понатамошните можности за инвестирање во Туркије“.
„Честитки до сите тимови кои се натпреваруваат на ТЕХНОФЕСТ“, напиша Маск, споделувајќи видео од настанот.
Потоа Ердоган одговори со уште една објава на Х: „Почитуван Елон Маск, би ни било задоволство да ве видиме на ТЕХНОФЕСТ следната година, најголемиот светски фестивал за авијацијата, вселената и технологијата.“
„Верувам дека ќе дадеме голем придонес за нашата земја и за човештвото во многу области преку партнерства со вин-вин пристап...“, рече Ердоган.
Турскиот претседател минатата недела се состана со Маск во Центарот „Туркеви“ во Њујорк на маргините на 78-то заседание на Генералното собрание на Обединетите нации, кога го покани да присуствува на ТЕХНОФЕСТ во Туркије, како и да ја основа својата седма фабрика на Тесла во Туркије.
Третото издание на ТЕХНОФЕСТ 2023 започна во средата во турската област Измир. Петдневниот фестивал кој се одржува на аеродромот „Чигли“ во Измир вклучува натпревари, авиошоуа, презентации и работилници.
Настанот претходно се одржуваше во различни турски градови во парните години, а во метрополата Истанбул во непарните години. По повод 100-годишнината од основањето на Република Туркије, оваа година настанот се одржа во три различни турски области.
Првото издание на настанот оваа година се одржа на аеродромот „Ататурк“ во Истанбул во мај, каде што беше постигнат светски рекорд од 2,2 милиони посетители. Вториот ТЕХНОФЕСТ годинава се одржа од 30 август до 3 септември во главниот град Анкара, привлекувајќи речиси 1 милион луѓе.
Агенција Анадолу е глобален комнуникациски партнер на настанот од неговото прво издание.
