Европскиот парламент ги повика земјите на ЕУ да го ограничат извозот на оружје во Саудиска Арабија и ОАЕ

БРИСЕЛ

Европскиот парламент (ЕП) ги повика членките на ЕУ да ја ограничат продажбата на оружје на Саудиска Арабија и Обединетите Арапски Емирати поради нерасветленото убиство на новинарот Џамал Кашоги и војната во Јемен, јавува Агенција Анадолија (АА).

Европскиот парламент вчера усвои нацрт-препораки за извозот на оружје, а од Стокхолмскиот институт за меѓународни мировни истражувања (SIPRI) јавуваат дека земјите на ЕУ се втор најголем продавач на оружје на Саудиска Арабија и Обединетите Арапски Емирати.

Во препораката на ЕП се наведува дека во извештаите на ОН се наведува дека Саудиска Арабија и Емиратите извршиле воени злосторства во Јемен и поздравена е одлуката на властите на Белгија, Данска, Финска, Германија, Грција, Италија и Холандија на ограничувањето на продажбата на оружјето на тие заливски земји.

„Европскиот парламент ги повикува сите членки на ЕУ да ја избегнуваат продажбата на оружје и воена опрема на Саудиска Арабија, Обединетите Арапски Емирати и другите членки на коалицијата која учествува во војната во Јемен“, се наведува во препораката.

Во препораката се наведува дека членките на ЕУ би требало да го следат примерот на Германија, Финска и Данска кои ја суспендираа продажбата на оружје на Саудиска Арабија по убиството на новинарот Џамал Кашоги.

Европскиот парламент исто така ги повика членките на ЕУ да ја суспендираат и продажбата на опремата за надзор на Египет, Бахреин, Саудиска Арабија, Обединетите Арапски Емирати и Виетнам за на тамошните власти да не им се олеснуваат внатрешните репресивни практики.