Десетици германски универзитети повеќе нема да објавуваат на Х од нивните официјални профили

БЕРЛИН (АА) – Повеќе од 55 универзитети и истражувачки институти во Германија денес соопштија дека ќе престанат да објавуваат содржини на социјалната платформа на Илон Маск, „Х“, претходно позната како Твитер, според медиумски извештаи, јавува Анадолу.

„Условите за отворена размена повеќе не постојат. Под превезот на наводната слобода на изразување, отворена е вратата за омраза, дезинформации и манипулации“, изјави Федералната асоцијација за универзитетска комуникација, цитирана од јавниот радиодифузер РББ.

Според портпаролката на Универзитетот во Потсдам, Силке Енгел, управата на Универзитетот донела одлука да го затвори својот официјален профил на „Х“, откако бил активен повеќе од 13 години.

„Го следиме развојот на ‘Х’ веќе подолго време и последните месеци не сме активни како порано, поради политичките случувања“, рече Енгел и додаде: „Сметаме дека сме место за размена базирана на факти, отворена дискусија и транспарентност – а тоа повеќе не е случај на оваа платформа.“

Во четвртокот, два од најголемите германски синдикати, Синдикатот за услуги (Верди) и Синдикатот за образование и наука (GEW), исто така, ја напуштија платформата „Х“ по 15 години активност.

Овие организации ја критикуваа платформата како „форум за ширење десничарски екстремистички ставови, омраза и агитација, непријателство кон демократијата и дезинформации“.

„Очигледно е дека алгоритмите на платформата даваат предност на антидемократските наративи“, истакнаа синдикатите.

Последните случувања доаѓаат по силните критики во германскиот политички естаблишмент против Маск за мешање во општите избори на 23 февруари.

Американскиот технолошки милијардер, кој наскоро ќе стане советник на новоизбраниот претседател на САД, Доналд Трамп, вчера јавно го изрази своето силно поддржување на крајно десничарската партија „Алтернатива за Германија“ (AfD).

„Ако сте незадоволни од состојбата, мора да гласате за промена. Затоа, силно препорачувам луѓето да гласаат за AфД“, рече Маск во онлајн разговор на „Х“ со лидерот на AфД, Алис Вајдел.

„Јасно сакам да кажам: само AфД може да ја спаси Германија“, додаде тој.

Минатата недела, германската Влада отворено го обвини Маск за обид да влијае врз изборната кампања преку неговите изјави.

„Иако има право на сопствено мислење, Илон Маск, всушност, се обидува да влијае врз федералните избори со своите изјави“, изјави заменик-портпаролката на Владата, Кристијане Хофман, на прес-конференција во Берлин.

„Изборите се одлучуваат од гласачите, а тоа е германско прашање“, истакна таа.