Демократите ќе ја задржат контролата во американскиот Сенат по победата во Невада

ВАШИНГТОН (АА) - Демократите ќе ја задржат контролата во Сенатот уште две години, откако Кетрин Кортез Масто е победник вчера во американската сојузна држава Невада на средномандатните избори што се одржаа на 8 ноември, јавува Агенција Анадолија (АА).

Кортез Масто, првата Латиноамериканка избрана во 100-члениот дом на Конгресот, го победи републиканецот Адам Лаксалт.

Демократите ќе имаат 50 места, без оглед што ќе се случи во вториот круг планиран во декември во сојузната држава Џорџија. Потпретседателката Камала Харис гласа само ако има израмнет резултат во Сенатот. Но, републиканците ќе имаат 49 места во Сенатот.

Во Џорџија, сенаторот од редот на демократите, Рафаел Ворнок, и републиканскиот противкандидат Хершел Вокер одат во вториот круг на 6 декември, кој ќе ѝ обезбеди место на победничката партија.

Американскиот потпретседател ја извршува функцијата претседател на Сенатот и може да даде глас доколку ситуацијата е нерешена. Традицијата на Сенатот е дека контролата на тоа рамномерно поделено тело оди кај партијата што ја контролира Белата куќа.

Демократите излегоа како победници и во Аризона откако сенаторот Марк Кели беше реизбран.

Контролата во Претставничкиот дом сè уште виси на конец, а проекциите им даваат мала предност на републиканците.

Републиканците освоија 211 места, додека демократите освоија 202 места, според Асошиејтед прес.

Секоја партија треба да освои 218 места за да има мнозинство.

Ако републиканците победат во Претставничкиот дом, законодавната агенда на претседателот Џо Бајден веројатно ќе биде запрена, и ќе се соочи со некооперативно тело во кое доминираат републиканците.