Данска потпишува договор за одбрана со САД

ЛОНДОН (АА) - Данска ќе потпише одбранбен договор со Соединетите Американски Држави (САД) што овозможува американски трупи и воена опрема да бидат стационирани на данска територија, изјави данската премиерка Мете Фредериксен, јавува Анадолу.

Десетгодишниот договор за одбрана ќе биде потпишан во текот на оваа недела и ќе стапи на сила за околу една година, рече Фредериксен.

Ова се случи откако Вашингтон потпиша сличен договор со Шведска и Финска претходно овој месец.

Договорот ќе стави крај на 70-годишната забрана за распоредување странски војници во скандинавската земја.

„Ова значи дека американските војници и опрема можат перманентно да бидат стационирани на данска територија“, изјави Фредериксен за новинарите на прес-конференција.

Таа додаде дека договорот праќа јасна порака дека Данска и нејзиниот сојузник, САД, заеднички „преземаат уште поголема одговорност за данската безбедност - и тоа е апсолутно неопходно“.

„Целта е: мора да го осигуриме мирот не само сега туку и за генерациите што доаѓаат по нас“, додаде Фредериксен.

Данските власти соопштија дека според договорот во земјата нема да има распоредено нуклеарно оружје и дека на американските војници ќе им биде дозволено да се стационираат во три дански воздухопловни бази.

Договорот, сепак, се соочува со жестоко противење од Енхедслистен, политичка партија во данскиот Парламент, и од некои други политички партии што тврдат дека договорот со САД го компромитира суверенитетот на Данска и потенцијално ја загрозува националната безбедност.

Договорот е одраз на дел од пошироката американска иницијатива за обезбедување воено присуство во Нордискиот и Балтичкиот Регион, објавија локалните медиуми.

Одлуката на Данска, Шведска и Финска да ги продлабочат безбедносните врски доаѓа по војната во Украина и зголемените тензии со Русија.